Anjely kely maro toa azy no inoako fa mitsena azy izao !
[Fanajana
]
19 Martsa, 2009 08:56
[Fanajana
]
12 Novambra, 2008 09:06
Veloma Miriam, mandria am-piadanana Mama Africa (nampiana)
Dia teto "Afrika" tokoa no nandaozany ny tany.
Tsy ilay Afrika, ilay kaontinanta mainty, ilay firenena nipoirany, ilay Afrikany ; fa ilay Afrika eoropeana araka ny vazivazinay mazàna.
Niady hatramin'ny farany izy ary lavo teo an-tany fiadiana raha avy naneho tamin'ny mozikany ny hiakam-pitolomana nitondrany ny fiainany nandritra ny taona maro : TSIA, tsy ekena ny herisetra, tsy ekena ny fanavakavaham-bolonkoditra
Lavo teo ambony sehatra tany atsimon'i Italia, tao Castel Volturno ao Caserta, nandritra ny rindran-kira nokarakaraina hanohanana an'i Roberto Saviano, mpanao gazety italiana sy mpanoratra, ary nanoratra ilay Boky mitondra ny lohateny hoe "Gomorra" izay efa vita horonantsary ankehitriny, ka nahatonga azy ho lasibatry ny "camorra" izay manjaka tsy refesi-mandidy tokoa ao amin'io toerana io. Castel Volturno izay sehatry ny herisetran'ny camorra ka namoizan'ny teratany afrikana 6 ny ainy roa volana lasa izay.
Hitodi-doha anio ho any Afrika atsimo, tanindrazany, ny nofo mangatsiakany.
Mama Africa, miondrika eo anoloanao am-panajana ny tontolo.
Mama Africa, mandria am-piadanana.
Veloma.
(sary : Riccardo Siano, Gazzetta del Sudafrica)
[Fanajana
]
22 Septambra, 2008 20:42
Tononkalo novakiana 16 taona katroka lasa izay, teny am-pandevenana an-dRamaroson Wilson, mpamoron-kira, sakaizan'i Rado.
NY RANTSANY
Mahaontsa ery ilay efitra nidirako
feno fitolokon'ny sento lavareny
f'ilay mpanisy feo ny andalan-tononkirako
no indro fa mangina, mikimpy tsy miteny
'Reo rantsany mpitendry, mpikitika ny lyrany
indreo, toa savolaina ka dia miala sasatra
any an-tsaina sisa ireo ngadongadon-kirany
nentiny nandoko ny kanto sy ny fatratra
Veloma ianao, Ramaro, mandria am-piadanana !
Be ny vitanao niarahana nitazana
Ary dia misaotra nametraka ho fananana
ireo hira sarobidy ho an'ny tanindrazana
Tsy maty akory ianao raha mbola misy ihany
olo-mahatsiaro ny asanao rehetra.
Ny nofonao no lo , hihintsana ho tany
fa ny hiranao tsy maintsy ho tafatoetra.
RADO - 6 septambra 1992
...atolotra ho azy nanoratra ihany koa ankehitriny.
[Fanajana
]
24 Mey, 2008 11:09
Handroso hasina ny "namana-reny" rehetra
any Frantsa sy any Madagasikara !
(sy izay firenena mankalaza manokana ny Reny amin'ny andron'ny 25 mai)
[Fanajana
]
15 Aprily, 2008 07:19
Mandria am-piadanana, Romule !
Nodimandry omaly 14 avrily izy (eo ankavia amin'ny sary) .
Ity hira ity isan'ny sangan'asany farany niaraka tamin'ny Gabhy sy Salomon.
Mirary fiononana ho an'ny fianakaviany.
